أول مراجعة على اليوتيوب والفيسبوك لسماعات ضعف السمع ستاركي ميوز اي كيو Starkey Muse IQ i2400 R الجزء الأول من تجربتي الشخصية يحكي عن تحديد الموديل المناسب لي من سماعات ضعف السمع " المعينات السمعية" وفقا للعوامل والأولويات التي تم شرحها في سلسلة ازاي تختار سماعتك صح: بالإضافة إلى شرطين إضافيين 1- تكون قابلة للاقتران بجهاز مساعد "SurfLink Mobile" 2- تكون بطارية قابلة للشحن "Rechargeable Hearing Aids" لو عندك أي استفسار بخصوص السماعات ابعت لنا رسالتك على صفحة الفيسبوك FaceBook || فيسبوك: : www.facebook.com/mo3azha معاذ ماضي Moaaz Mady ================================= نص الفيديو: طبعا مازال لسه فيه غموض شديد في موضوع اختيار السماعة المناسبة وازاي تشتري السماعة الصح... وأنا شخصيا مريت بالمرحلة دي زمان، وكنت مش لاقي وقتها اللي يساعدني أني أعرف أختار السماعة الصح ازاي وألاقيها صح إزاي، لحد ما ربنا كرمني وعلمني ومريت بتجارب كويسة كثير بعد كده. النهاردة أنا قررت أشارككم آخر تجربة ليا في شراء السماعة اللي معايا دلوقتي لعل التجربة دي تفيد حد وتلهمه إنه يعرف إزاي يحدد احتياجاته صح من السماعة …. وأنا بأصور الفيديو ده،تقريبا كده مر عليا سنة بالضبط بسماعتي الجديدة ،يعني أنا تقريبا اشتريتها من يونيو 2019 إلى يونيو 2020، حصل خلال السنة معظم التجارب والمشاكل اللي بتواجهنا مع السماعة، زي مواقف ضبط برمجة السماعة زي إن السماعة تقف مرة واحدة وتبوظ وتجربة تغييرها في الضمان، وتعامل شركة ستاركي في تصليح السماعة ، كمان دخلنا في وباء الكورونا اللي قعدنا في بيوتنا، ربنا يعافينا جميعا ودلوقتي القانون بيلزم الناس كلها تلبس الكمامات، مشكلة تفسير الكلام مع اللي بيغطي وشه بالكمامة دي أكثر مشكلة بتقابل ضعاف السمع دلوقتي هل السماعة دي هاتساعدني في الموقف الصعب ده ولا زيها زي غيرها.. النهاردة هانتكلم عن مرحلة الاختيار فكرت كثير قبل ما أصور الفيديو ده ……… إزاي أتكلم عن السماعة وتجربتي معاها... خصوصا…. إن السماعة تجربتها بتختلف من شخص لآخر على حسب عوامل كثيرة جدا، منها عوامل مرتبطة بحالة الشخص نفسه اللي هايلبس السماعة ونسبة التفسير بتاعته وظروفه حياته وأولوياته. لذلك هأحاول أخلي حلقات مراجعة السماعة تكون بطريقة تفيد أي حد سواء لابس سماعات بالفعل أو في مرحلة الاختيار حاليا أو عمره ما لبس سماعات أصلا.. والنهاردة هاتكلم معاكم عن مرحلة الاختيار، وعوامل الإختيار عندي بالإضافة إلى ال 10 أولويات شرطين اضافيين ، الشرط الأول: سماعة تكون متوافقة مع الجهاز المساعد اللي معايا بالفعل والشرط الثاني ، تكون بطاريتها ليثيوم القابلة للشحن. في البداية كده، خلونا نتعرف على السماعة وازاي أنا اخترتها.. الشركة: السماعة دي من شركة اسمها ستاركي ستاركي شركة أمريكية، وهي واحدة من السبع شركات الكبار في عالم السماعات الطبية، وليها تاريخ عريق جدا في أمريكا، وتعتبر سماعة الرؤساء والمشاهير هناك، لأنها متميزة في السماعات الداخلية والمخفية داخل الأذن، ويمكن من أشهر الشخصيات اللي لبست سماعات ستاركي كان الرئيس الأمريكي الأسبق ريتشارد ريجان. يعني الشركة إسمها تقيل برضه.. الموديل: في 2017، ستاركي عملت تحسينات كبيرة في البلاتفورم بتاعتها، واديتله اسم مختصر اللي هو IQ وقدمت ساعتها مجموعة سماعات في البلاتفورم الجديدة دي كالآتي: SOUNDLENS SYNERGY iQ ودي تعتبر واحدة من أفضل السماعات ال IIC المخفية بالكامل داخل الأذن في العالم، ومن السماعات ال IIC النادرة اللي فيها امكانيات الوايرليس، ودي الامكانيات اللي اتكلمت عنها في السلسلة اللي فاتت في الحلقة 9 و10. السماعة دي بتأخذ بطارية مقاس 10. ولكن لم أختار هذه السماعة لسببين رئيسيين، إني مش عايز سماعات داخلية، وإن السماعة دي تحديدا قوتها أقل من المطلوب لمقياس السمع بتاعي، يعني مش هاتنفعني كويس HALO iQ ودي سماعات خارجية مفيش منها سماعات داخلية، بس من نوع ريسيفر داخل الأذن RIC، يعني سماعات صغيرة في الحجم وجميلة، بس ببطاريات، في منها بطارية 312، وفيه منها ببطاريات 13. لكن مفيش منها سماعات ببطاريات ليثيوم القابلة للشحن. بس المميز فيها حاجتين، 1- إنها Made For Iphone، MFI، وده معناه إن فيها بلوتوث مباشر بس فقط مع أجهزة الآيفون أو الآيباد.. 2- الميزة الثانية إن ليها موبايل أبليكشن بيديلك إمكانيات ممتازة للتحكم في سماعتك.. وممكن لو جاتلي فرصة نتكلم عنها في فيديوهات تانية مخصوص ليها. لكن برضه ما اختارتش السماعة دي رغم إنها مناسبة ليا من حيث القوة والمقياس، ورغم التكنولوجي اللي فيها ، بس أنا كان عندي شرطين مش موجودين فيها … الشرط الأولاني، إن استغنى عن البطاريات تماما، والشرط الثاني إني أقدر أستخدم الجهاز المساعد اللي كان معايا وقتها اللي هو Surflink Mobile. وللأسف Halo IQ مش قابلة للاقتران بيها وده الحقيقة نقطة ضعف الموديل ده للأسف. MUSE iQ والسماعة دي نزلوا منها أشكال كتير، نزلوا السماعات الداخلية بالتلت أنواع ال: CIC, ITE, ITC وفيه منها سماعات BTE المعروفة ومنها سماعة Power Plus BTE اللي بتغطي لحد الضعف العميق عند 120 وبتدي باور ل 80 ديسيبل مع بطارية 13مش 675. وكمان زي ال Halo IQ فيه منها السماعات الريسيفر داخل الأذن RIC، و في منها مقاسين مقاس Micro وأصغر، والمقاس العادي هو أكبر سنة بس صغير جدا. وفي بقا منها السماعتين دول بياخدوا بطاريات عادية 312، وفي بقا اللي بياخدوا بطارية Lithium فالإختيارات هنا أوسع. الحاجة التانية كمان أن ال Muse قابلة بالإقتران بالجهاز المساعد بتاعي اللي هو ال SURFLINK. فطبعا دي كدة حققت بالنسبة لي الشرطين. ولكن مفيهاش بلوتوث مباشر مع الآيفون، ومالهاش موبايل أبليكيشن زي ال Halo IQ. فطبعا حاجة أمام حاجة فمحتاج برضو تقرر أنت محتاج ايه. أنا بالنسبة لي كانت الأولوية الأهم الجهاز المساعد والبطارية الليثيوم. فطبعا إخترت ال MUSE ال RIC اللي هي فيها بطارية ليثيوم.
الاشتراك في:
تعليقات الرسالة (Atom)
ليست هناك تعليقات:
إرسال تعليق